Manarimaan paylaeng ti imbestigasion ti Baguio City Police Office (BCPO) iti kaso ti maysa a lalaki a nasarakan a pimmusay iti lay-by ti Loakan Airport idi Agosto 29,2025.
Sigun kadagiti pulis, mangisaysayangkatda iti routine patrol idi nadlawda ti nakaparada a motorsiklo iti nasao a lugar.
Bayat ti panagbirok dagiti opisial iti agtagikua ti motor, nakitada ti maysa a lalaki a nakatugaw iti sementado a kalsada.
Idi pinadasda nga awagan ti atensionna, saan a simungsungbat daytoy.
Idi immasideg dagitoy tapno sukimaten, naduktalan dagiti polis a rumrummuar ti dara manipud iti ulona ket nadlawda a nakaiggem ti makannigid nga imana iti Caliber 9mm Armscor pistol.
Dagos nga inawaganda ti Emergency Medical Services ti siudad.
Kinumpirmar met dagiti nagresponde a pimmusay ti lalaki idi nasarakan dagiti patrol team.
Nabigbig dagiti otoridad a ti biktima ket agtawen ti 25-anyos ken residente idiay Poblacion, La Trinidad, Benguet babaen ti driver’s license a naalada.
