SABANGAN, MT. PROVINCE – Manarimaan ti imbestigasyon ti Bureau of Fire Protection iti rason ti napasamak nga uram idiay Liwang, Barangay Losad, Sabangan iti parbangon ti Setyembre 8, iti agdama a tawen.
Iti panakiuman ti Bombo Radyo kenni Fire Officer 2 Kayle Ann Policdas, panakangiwat ti Bureau of Fire Protection – Sabangan, maysa a karit ti nailet a pagnaan nu sadino saan a nakaserrek ti fire truck, rason a water pump ti inaramatda iti panagresponde dagitoy.
Nauram ti innem a balay ken napukawan ti lima a pamilya wenno sangapulo ket maysa nga indibidual ti pagtaengan.
Nagrugi ti uram iti 2:56 ti agsapa ken naideklara ti fire out iti 5:15 metlaeng iti agsapa.
Awan ti nadangran wenno pimmusay iti nasao nga insidente.
Maibasar iti imbestigasyon, mapatta-patta a dumanon iti P2.7 million ti danyos dagiti nauram a pasdek ken kagawaan.
Dagiti nagresponde iti nasao nga uram ket ti nagtinnulong a puersa ti Bureau of Fire Protection Sabangan, Capinitan, Balili, Bauko, ken Bontoc ken dagiti residente.
Kabayatanna, dagus a naipaay ti tulong kadagiti biktima ti uram pakairamanan ti food packs, sleeping kits, kitchen kits, ken hygiene kits.
Naipaay metlaeng ti sag-P10,000 each kadagiti pamilya a completely destroyed ti balayna bayat a P5,000 each kadagiti pamilya a partially damaged ti balayna.
