BAGUIO CITY – Manamnama a mangrugi ti Food Trade Fair inton March 10 a maipasdek idiay Juan Luna Drive, Baguio City.
Kasaruno daytoy ti saan pay a naikkat a sumagmamano nga stalls iti baet ti kaleppas a Panagbenga trade fair.
Iti interview ti Bombo Radyo kenni Councilor Elmer Datuin, daytoy ket panagsagana iti inaprobaran ti city council nga ordinansa a mangipalpalubos iti Hotel and Restaurant Association of Baguio (HRAB) para iti panakaipasdek ti food booth.
Kinunana a food-related ti mailako iti manamnama nga stalls gapu ta cultural/souveiner items laeng ti nailako idi napalpalabas.
Manamnama met nga agpaut daytoy iti makabulan apaman nga aprobaran ti konseho.
Inlawlawagna ni Datuin a supsuportaranda ti Tourism sector gapu ta maysa daytoy kadagiti aktibo a nakipartisipar iti kaleppas a Panagbenga activity ken preparation.
Malaksid iti dayta, manamnama a daytoy ti maudi nga aktibidad ita a tawen.
Kabayatanna, awanen ti maipasdek a trade fair iti Malcom Square kasaruno ti unanimous a panag-aprobar ti city council iti panakaisardeng ti trade fair iti nasao a parke.//Bombo Marinel Rodrigo
