BAGUIO CITY – Balligi ti panakaisayangkat ti Community Relations Service Month celebration iti Baguio City Jail iti Session Road, Baguio City.
Iti interview ti Bombo Radyo kenni Jail Superintendent April Rose Wandag-Ayangwa, Warden ti Baguio City Jail Male Dormitory, agyamyaman iti kameng ti Bureau of Jail Management and Penelogy – Cordillera iti suporta ti publiko maipapan kadagiti aktibidad dagitoy pakairaman ti panangtagiragsakda kadagiti nagduduma a libre a serbisyo nga ipapaayda iti tunggal domingo.
Kinunana nga iti maika-dua a domingo ti programada ket agarup 1,146 a benepisyaryo ti nagnumar iti serbisyo pakairamanan ti dental ken medical check-ups, blood letting activity, legal consultation ken dadduma pay.
Malaksid iti dayta, manamanama pay a maitampok ti nagduduma a produkto dagiti Persons Deprived of Liberty ken maisayangkat dagiti nagduduma a libre a serbisyo kas iti Read-a-book para kadagiti ubbing iti Session Road iti nabatbati pay a dua a dominggo ita a bulan ti Hunyo 2024.
