Naaprobaranen iti House of Representatives idi kalman iti maikadua a pannakabasa ti gakat a mangkidkiddaw iti P200 a pannakaingato ti inaldaw a sueldo dagiti mangmangged iti pribado a sektor.
Nakalanad iti House Bill No. 11376 wenno ti “Wage Hike For Minimum Wage Workers Act” a maipangato iti P200 iti inaldaw a rate dagiti amin a minimum wage workers iti pribado a sektor, aniaman ti kasasaad ti panggedanda.
Saklawen ti gakat dagiti mangmangged iti pribado a sektor a contractual ken sub-contractual arrangements, kasta metten dagiti mangmangged iti sektor ti agrikultura ken non-agriculture.
Nalakanad pay iti gakat a mabalin a makaala ti insentibo dagiti small enterprises manipod iti Department of Labor and Employment a makatulong kadakuada a mangtungpal iti pannakaingato ti sueldo.
Dagiti aglabsing iti naisingasing a linteg ket mamulta iti P100,000 agingga iti P500,000, wenno maibalud iti nagbaetan ti dua agingga iti uppat a tawen.
Naikeddeng ti P200 a panagngato ti sueldo kalpasan a nakipagsarita ti House of Representatives iti labor groups.
Kabayatanna, naaprobaranen iti Senado ti P100 legislated daily minimum wage hike para kadagiti mangmangged iti pribado a sektor idi Marso 2024.
