BAGUIO CITY – Palpalagipan ti COMELEC-Baguio ti publiko seknan iti umno a lugar a pagpaskilan kadagiti karatula dagiti national candidate.
Kasaruno daytoy ti opisyal a panagrugi inton bigat iti campaign period dagiti national candidates.
Sigun kenni City Election Officer Atty. Reynan Solbita, maiparit ti panagpaskil iti karatukala kadagiti disso wenno pasdek a tagikua ti gobierno.
Kinunana a nasken a makiddaw ti pammalubos dagiti agtagikua iti pribado a lote wenno pasdek sakbay a mangipaskil ti karatula dagiti kandidato wenno supporters dagitoy.
Inayonna a nasken nga adda ti nagan ken address dagiti indibidual a nangaramid iti campaign materials ti maysa a kandidato.
Impetteng ni Solbita nga adda ti umno wenno standard size dagiti campaign materials a maipaskil kadagiti poster area/headquarters ken nasken a recycable dagitoy.
Dinakamatna a nasken a masurot ti 3×8 feet a kadakkel ken kalawa ti karatula a maipaskil iti headquarter, 2×3 feet iti poster area ken 21.59 cm x 33.02 cm iti Pamphlet stickers.
Adda met ti task force a madutukan a mangbaklas kadagiti umno ken iligal a campaign materials.
Impaganetgetna metlaeng a posible a maidiskwalipikar dagiti kandidato nga aglabsing kadagiti nadakamat a pagalagadan.
Kabayatana, agdependar iti alert level ti wagas ken pamay-an dagiti kandidato iti Baguio City nga agkampanya tapno saan a maikompromiso ti salun-at ti publiko.
Kinunana ni Atty. Solbita a nasken a mangisumitir dagiti kandidato ti aplikasionda iti COMELEC tapno madesisionan no maipalubos wenno saan ti panggepda a wagas ti panagkampanya.
Dinakamatna a maiparit ti in-person wenno house to house campaigning kadagiti lugar a naipasidong iti Alert Level 3.
Iti sidong ti Alert level 1, lima laeng nga indibidual ti mabalin a mangkadwa iti maysa a kandidato a mangipatungpal ti house to house campaining bayat a tallo laeng nga indibidual iti sidong ti Alert Level 4.
Iti met sidong ti Alert level 5, saanen a maipalubos ti house to house campaigning, caucus, rally, caravan malaksid laeng ti online campaiging.
Impettengna a maiparit ti selfies, panaglamo, panag-innarakop ken daduma pay a kita ti physical contact aniaman ti alert level status ti maysa a lugar.
Impaganetget ni Atty. Solbita nga iti kanito a maipatungpal ti online campaigning ket masapul a maiparehistro iti COMELEC ti social media account dagiti kandidato tapno maipasigurado a maaramat laeng iti panagkampanya. (Bombo Cara Sacyaten)
