BAGUIO CITY – Umdas ti pagmulaan ti pagay iti rehiyon Cordillera babaen iti Farming Support Program babaen iti Contract Farming nu sadino masupsuportaran ti panagtalon dagiti mannalon.
Dagiti apit dagiti mannalon a pagay ket mailako iti P29 tunggal kilo babaen iti Kadiwa store.
Iti panakiuman ti Bombo Radyo kenni Engr. Liza Jane Challikis, Operations Section Chief ti National Irrigation Administration – Cordillera, makatulong daytoy a programa tapno agtultuloy ti panakailako ti bagas iti nasao a presyo.
Sigun kenkuana, dumanon iti 496 nga ektarya laeng manipud Kalinga ken Apayao ti naki-kontrata para iti nasao a programa ita a tawen.
Nupay kasta, kinuna ni Challikis a nanayonan ti nakaprogram para inton sumaruno a tawen a dumanon iti 2,908 nu sadino buklen daytoy ti daduma a probinsiya malaksid iti probinsiya ti Benguet.
Gapu iti dayta, ad-adda a manayonan pay ti pagay a maapit inton sumaruno a tawen.
Inlawlawagna a mangipapaayda ti suporta iti umuna a tranche a P50-K tunggal ektarya kadagiti mannalon.
Nu maipapan met iti ani, ipaay dagiti mannalon ti 5 metric tons per hectare ken maipaay manen ti 2nd tranche a P50-K.
Iti nasao a contract farming, saan a malugi dagiti mannalon gapu ta adda ti maipapaay a suporta kadakuada.
Kabayatanna, maipaay ladta ti P50-K a tranche kadagiti mannalon apaman a mapasaran ti panagbabagyo ngem saanen a maipaay ti kapada a gatad para iti 2nd tranche.
