BAGUIO CITY – Maur-uray paylaeng ti resulta ti samples dagiti 21 a persons under investigation (PUIs) iti COVID-19 ditoy rehiyon Cordillera.
Sigun kenni DOH-Cordillera regional director Dr. Amelita Pangilinan, agtaltalinaed a 61 ti PUIs iti rehiyon no sadino, 40 kadagitoy ti nakaruar iti pagagasan bayat a dagiti 21 ket agtaltalinaed iti health facilities.
Kinunana a manipud kadagiti 21 a PUIS ket 9 iti Baguio City, 7 iti Benguet, sag-1 iti Abra, Apayao ken Mountain Province, ken 2 iti Kalinga.
Sigun pay kenkuana, rinugian metten ti Baguio General Hospital and Medical Center ti panagsukimat iti samples dagiti PUIs.
Nupay kasta, inlawlawagna a tallo laeng a genes ti ipasidong daytoy iti screening ken no positibo ti resulta ket dagus a maiturong wenno maipaima iti iti Research Institute for Tropical Medicine para iti confirmatory tests.
Kinuna met ni BGHMC medical center chief Dr. Ricardo Ruñez Jr. a no maipasidong iti testing iti COVID-19 ti maysa nga indibidual ket ti PhilHealth ti agbayad.
Gapu iti daytoy, pilpilyenda nga aramaten ti naawatda a test kits kadagiti symptomatic patients wenno dagiti nakitaan ti sintomas ti COVID-19.
