Agtultuloy ti serbisyo ken programa nga ipapaay ti Bahay Pag-asa center iti siudad ti Baguio kadagiti agtutubo a nakalabsing iti paglintegan wenno kadagiti nakaaramid iti saan a nasayaat.
Iti panakiuman ti Bombo Radyo kenni Florecita Tul-an, Social Welfare Officer iti siudad ken dadaulo ti Bahay Pag-asa, kinunana nga ado a programa ti ipapaay dagitoy kadagiti ubbing tapno dagus a marehabilitate wenno makarekoberda.
Sigun kenni Tul-an, daytoy ket pakairamanan ti residential program, ti panangipaay iti pasilidad kadagiti ubbing a naglabsing iti linteg gapu ta saan a mabalin a maiturongda iti pagbaludan.
Malaksid iti dayta ket ti diversion program, ti proseso para iti panakalawlawag ti kapanunotanda wenno ti kinabayag ti panagiyanda iti Bahay Pag-asa a mabalin a dumanon iti tallo a bulan, innem a bulan wenno maysa a tawen, depende no kasano ti coping mechanism dagitoy.
Adda met ti livelihood program a maipapaay kadagiti ubbing kas iti baking no sadino agar-aramid dagitoy iti pandesal ken cookies, kasta met iti painting, urban gardening ken daduma pay.
Innayon ni Tul-an a dagiti daduma nga aktibidad dagitoy ket ti “spiritual enrichment,” ti panakaipatungpal ti tutorials manipud kadagiti mannursuo iti siudad ken ti monthy a panakakita ti salun-atda babaen iti koordinasyonda iti Irisan Health Clinic.
Kabayatanna, kalpasan ti panagrekober iti maysa nga ubbing iti facility center ken panagsublina iti pamilya daytoy ket maipaay ti serbisyo nga “after care service.”
Daytoy ket tapno, agtuloy ti panakamonitor iti ubbing.
