BAGUIO CITY – Sumangsango iti nagtutuon a kaso a panaglabsing iti Anti-Drunk and Drugged Driving Act of 2013, disobedience to an agent of person in authority ken unjust vexation ti maysa a taxi driver iti insidente iti nagbaetanda iti maysa a pulis a traffic enforcer sadiay Abanao Street, Baguio City idi kalman.
Nabigbig ti complainant a ni Patrolman Julius Walang a nakadestino iti Traffic Enforcement Unit ti Baguio City Police Office bayat a nabigbig ti naireklamo a respondent a ni Jone Dominguez Buclay, residente ti Asin Road, Baguio City, driver ti taxi nga addaan trade name a ‘J Mabalot Taxi’.
Iti interview ti Bombo Radyo Baguio kenni Pat. Walang, kinunana nga imanmandona ti taray ti trapiko sadiay Abanao Street idi nakitana nga ipilpilit ni Buclay a sumrek iti pay parking area sadiay.
Immasideg ni Pat. Walang kenni Buclay ken kinasaritana daytoy a napunnon ti nasao a paradaan ken mangituntunda iti trapiko ti ar-aramidenna.
Nupay kasta, saan nga impangag ni Buclay ni Pat. Walang ken impilitna latta a sumrek iti nasao a paradaan.
Tikitan kuman ni Pat. Walang ni Buclay isut gapuna a kiniddawna ti driver’s license daytoy ngem imbaga ni Buclay a pumanawen daytoy.
Nupay kasta, papanawen ni Buclay idi nangisawang iti dakes a pannarita a saan a nakayatan ni Pat. Walang isut gapuna a linapdanna ti taxi driver ken kiniddawna manen ti driver’s license daytoy.
Imbes a sumardeng, intuloy ni Buclay a nagmaneho bayat nga adda iti sangwanan ti taxi ni Pat. Walang a mangpaspasardeng kenkuana.
Nagkapet ken simmang-at ni Pat. Walang iti hood ti taxi idi nariknana a pinartakan ni Buclay ti taray ti taxi.
Simmardeng laeng ti taxi kalpasan ti dumanon 25 a metro gapu iti panangbusbusina ditoy ti maysa a maseknan a motorcycle rider.
Dagus a kinemmeg ni Pat. Walang ken ti kadwana a traffic enforcer ni Buclay ken sadiay a nadlawda nga adda ti taxi driver iti impluwensia ti arak a nakumpirmar iti medico legal test.
Inaklon metlaeng ni Buclay a nakainom daytoy iti arak kalpasan a nagpositibo iti breath analyzer test.
Inturong dagiti pulis ni Buclay iti Baguio City Police Office – Station 7 ngem kabayatan ti panang-fill-up ni Pat. Walang iti Incident Record Form iti uneg ti istasyon, killaat a simmangpet sadiay ni Judge Roberto Mabalot.
Nailanad iti blotter ti pulisya a dagus a binagaan ti nasao a judge ni Buclay iti napigsa a boses iti saan daytoy a panangisawang iti aniaman a waragawag.
Nakita ni Judge Mabalot ti medico-legal certificate nga iggem ni Buclay ken kinunana a traffic violation laeng ti kaso, mamulta laeng daytoy ken saan a maibalud.
Dinamag ti nasao a judge no nabartek ni Buclay ken inaklon met daytoy a nagiinomda iti arak agingga ala una ti parbangon idi kalman.
Nailanad pay iti blotter a kalpasanna ket imbaga ni Judge Mabalot iti napigsa a boses nga awan ti rason tapnu i-hold dagiti pulis ni Buclay gaputa traffic violation laeng ti kaso daytoy ken mamulta laeng isut gapuna a mabalinda a pumanaw.
Impaayan laengen dagiti pulis iti traffic citation ticket ni Buclay sakbay daytoy a pimmanaw kadwa ti nasao a judge.
Gapu iti insidente, imbilin ni Baguio City Mayor Benjamin Magalong ti panakairaman ni Judge Mabalot iti imbestigasyon ti kaso gapu iti maatap a panakibiang daytoy iti kaso a nagresulta tapnu ma-release ni Buclay ken ti taxi unit nga uray saan pay a naipasidong iti inquest proceedings.
Dinayawna met ni Pat. Walang gapu iti impakita daytoy nga stability ken composure iti baet ti napasamak.
Impeksa pay ti mayor ti panagyamanna gaputa awan ti dakes a napasamak iti nasao a pulis. (with Bombo Nikki Agsiweng)
