Inyebkas ni Vice President Sara Duterte ti ayatna a makipaset kadagiti masungad a panagdengngeg maipapan iti pannakakakemmeg ti amana a ni sigud a President Rodrigo Duterte.
Sigun kenni Vice President Sara, inawis ni Senador Imee Marcos isuna a makipaset kadagiti panagdengngeg nga idauluanna kas chairman ti Senate committee on foreign relations.
Ni Vice President Sara ket nagsublin iti Pilipinas kalpasan ti nasurok tallo a lawas a panagyanna idiay Netherlands tapno mangipaay ti tulong iti amana a nakabalud ita idiay The Hague.
Silulukat ti nasao nga opisial a sumungbat kadagiti damag a kasapulan iti panagdengngeg, sigun mismo kenkuana.
Idi laeng kalman, kinumpirmar ti Malakanyang a tumabuno dagiti executive officials iti sumaruno a panagdengngeg iti pannakakemmeg ni Duterte inton Abril a diez.
Kinuna ni Palace Press Officer Undersecretary Atty. Claire Castro a karaman kadagiti makipaset ket da Justice Secretary Jesus Crispin ”Boying” Remulla; Prosecutor General Richard Anthony Fadullon; Chief State Counsel Dennis Arvin Chan; Foreign Affairs Secretary Enrique Manalo; Philippines Center on Transnational Crime executive director Anthony Alcantara; Philippine National Police chief General Rommel Francisco Marbil; PNP-Criminal Investigation and Detection Group chief Major General Nicolas Torre III; Migrant Workers Secretary Hans Cacdac; special envoy Markus Lacanilao; Atty. RJ Bernal; ken Atty. Ferdinand Loji Santiago.
Maipalagip a kinuna ni Executive Secretary Lucas Bersamin a saan a makipaset dagiti nadakamat nga opisial babaen ti executive privilege.
