Nabigbig ti lokal a gobierno iti La Trinidad ken ti La Trinidad Municipal Police Station (MPS) kalpasan a nakaawat ti dua a kangrunaan a pammadayaw manipod iti Philippine National Police (PNP) National Headquarters bayat iti culminating activity idiay Camp Crame, Quezon City idi Hulyo 30, 2026.
Personal nga impaay ni PMGen Wilson Joseph Lopez ti Plaque of Merit ken streamer iti La Trinidad MPS kalpasan daytoy a nabigbig kas Outstanding Police Community Affairs and Development (PCAD).
Kabayatanna, nakaawat met ti lokal a gobierno iti Plaque of Appreciation kas Outstanding LGU Stakeholder Nationwide gapu iti agtultuloy a pannakitinnulong daytoy kadagiti programa ken inisiatiba para iti kinatalna ken kinatalged iti komunidad.
Personal nga inawat da Mayor Roderick Awingan ken Police Chief PLt. Col. Zacarias Caloy Dausen dagiti pammabigbig a pammaneknek iti natibker a relasion iti lokal a gobierno ken pulisia iti panangipatungpal kadagiti programa a pagsayaatan iti publiko.
Sigun iti PNP, dagiti pammadayawa ket pammaneknek iti epektibo a koordinasion iti nagduduma nga ahensuia iti panangital-o iti public safety initiatives ken panangibangon iti relasion iti gobierno ken iti umili.
