BAGUIO CITY – Naipakitan iti publiko ti logo ti Cordillera Weaving Industry Council kagiddan ti panakarambak ti 3rd Cordillera Weaving Industry Summit idi kalman.
Ti logo ket addaan ti disenyo a babai nga aghabhabi.
Iti panakiuman ti Bombo Radyo kenni Director Nancy Bantog, Chairperson ti Cordillera Weaving Industry Council, ti logo ti agbalin a gundaway tapno nalaklaka ken naparpartak a mabigbig ti council.
Iti met sabali a bangir, adda dagiti sumagmamano a parikut a mapaspasaran ti weaving industry pakairamanan ti pagtaudan dagiti threads a maaramat iti weaving.
Sigun kenkuana, agtaud pay ti thread iti ballasiw-taaw gapu ta agkurkurang ti sustainable source ti thread iti siudad.
Malaksid iti dayta, agkurkurang ti source ti dye.
Kabayatanna, silulukat agingga ita nga aldaw ti Weaving Industry Exhibit a masarakan iti kalatakan a mall ditoy siudad nu sadino tampok dagiti weaved products pakairamanan dagiti kawes, bag, wallet, scarf, doormat ken dadduma pay.
