BAGUIO CITY – Dukduktalen ti Bureau of Fire Protection – Baguio ti danyos ken rason ti panakauram ti residential house idiay Purok 7, Sunnyside, Brgy. Fairview, Baguio City ita nga agsapa, Hulyo 4.
Naideklara ti fire out iti 6:05 ti agsapa metlaeng.
Sigun iti concerned citizen, dagus nga intawag da iti kameng ti bombero idi nadlawda ti maur-uram a balay iti 3:30 ti agsapa.
Kinunana da nga adda ti nanggegda nga agap-apa manipud iti lugar a nagtaudan ti uram.
Iti inisyal nga imbestigasyon ti Bureau of Fire – Baguio, ti nauram ket maysa a bungalow, ken dua a kadsaaran a pasdek.
Naapektaran ti walo a pamilya a buklen ti agarup innem a pulo nga indibidual.
Maysa kadagiti karit iti panagresponde dagiti maseknan ket ti nailet a pagnaan paturong iti lugar a nakapasamakan ti uram.
Awan ti nadangran wenno pimmusay iti nasao nga insidente.
Kabayatanna, impanamnama ni Mayor Benjamin Magalong ti maipaay a tulong kadagiti pamilya a naapektaran ti uram.
Iti agdama, adda dagiti biktima iti Barangay Hall ken manamnama a maiyakar da iti evacuation center.
